صباح الخير ياحلوين
كيفكم ان شاء الله بخير ,وكيف الشتويه معاكم ؟
بالنسبه لي احب اجواء الشتاء لكن المشكله الي يمكن اغلب البنات الي يتضايقو منها هيا الجفاف الزايد بالفتره هذي بالجسم وحابين ترطيب ونعومه بالجسم طوال فصل الشتاء , بس حابه اول شيء اوضح نقاط بعض البنات ماخذينها فكره عن المرطبات
اول نقطه انه الترطيب القوي والكويس مارح يكون بالمنتج الا لو كان سعره غالي وثاني نقطه ان الترطيب الخارجي يكفي
بالنسبه للنقطه الاولى فهي غلط X بغلط , بتقولي لي ليش ؟ لانه ممكن تشتري منتج غالي ويكون ترطيبه تقليل ومؤقت وممكن تشتري منتج سعره رخيص او معقول وترطيبه كويس ويدوم وقت اطول .
الفكره مو فكرة اشتري الرخيص واتركي الغالي او العكس , انا بقصد البنات الي يلغو فكرة المرطبات بحجة انه اووه ماعندي دخل مادي يخليني اقدر اشتري مرطبات للشتاء .
اما بالنسبه للنقطه الثانيه فهي رددتها كثير بتدوينات العنايه لاني عارفه انه الاغلب منا ينساها او يستهان فيها وهي شرب المويا
ومع برد الشتاء مو كثير نحس بالعطش بيومنا فعشان كذا سوي لك منبه يذكرك او استكرات بالاماكن الي تجي عينك عليها كثير
ليذكرك بشرب المويا من 6 -8 اكواب بالمويا
* ممكن بالبرد احيانا يجينا الكسل بالترطيب بس ماعليه حاولي تضغطي على نفسك شويه بالنسبه لي الي اسويه اشتري قبل الشتاء كم منتج من الدرق ستور مختلفين عشان اتحمس طوال الشتاء اجربهم ويروح مني التكاسل
فبتدوينة اليوم راح اتكلم عن المرطبات الي شريتها للشتويه هذي وبديت استخدمها
المرطب الاول : جرجنز بالمسك
بالنسبه لي عيبه الريحه القويه ينتشر بالمكان وممكن يضايق احدحولك مايفضل الروائح القويه
من ناحية الترطيب يعتبر متوسط ويدوم فتره طويله يوم كامل وهذا الشيء حلو
استخدمه بعد الشاور
المرطب الثاني : كريم 24
ترطيبه خفيف ويدوم ساعات افضله وقت الطلعه اليوميه
وتمتصه البشره بسهوله مايدهن
المرطب الثالث : كريم نيفيا بزبدة الكاكو
ترطيبه متوسط وريحته حلوه وخفيفه استخدمه بالطلعات اليوميه
جربت قبل كذا اللوشن وكان اخف بكثير من الكريم فاانصح بالكريم اكثر
المرطب الرابع : زبدة الشيا
ترطيبها قوي جدا واحبها قبل النوم لانها تترك طبقه دهنيه وتدبق بالجسم لكن عشان نتايجها ينصبر عليها
ماانصح تستخدميها وقت الطلعات طريقتي فيها اخففها بزيوت اللوز المر + الليمون + جنين القمح
يعطيكي الترطيب القوي والتوحيد والنضاره والنعومه
فوايدها كثيره لكن الي همني فيها انها تعالج الجفاف بفصل الشتاء
المرطب الخامس : زبدة الكاكو
برضو استخدممه بالليل قبل النوم
ريحته قويه وترطيبه قوي تعالج الجفاف
المرطب السادس : جلسويد بالمسك
لوشن قوامه خفيف ويرطب بشكل خفيف الجسم يدوم ساعات بس وريحته حلوه وهاديه
المرطب السابع : مرطب ديبست
يعتبر جل شبيه بالفازلين قوامه ثقيل وترطيبه قوي
الحلو فيه انه يعالج التشققات والجفاف بالقدام واليد والشفايف
جربته لل 3 اشياء هذي وكان جمييييييل نعومه وترطيب ويدوم فتره طويله
وبكذا انتهت التدوينه
ليست هناك تعليقات:
إرسال تعليق