مرحبا بنات
كيفكم أن شاء الله تمام ..!
رجعت لكم بتدوينه اكمال لـ سلسلة كيف تحصل على ماتريد
الجزء الثالث
1
اذا انتي قررتي تبين شغله معينه لاتقعدين تختلقين الاعذار اوووه ممكن يصير كذا اوووه ممكن يصير كذا لاتختلقي الاعذار ابدا
لانه هذا الشيء انتي تبغينه فحققيه لنفسك مو أحد ثاني يبيه لمن تبين تفتحين مشروع لاتقولين اووه الواسطات والبلديه ومحد راح يخليني الاعذار هذي مارح تفيدك بشيء وغيرك يوصل ويسوي اونتي عايمه في افكارك السلبيه اذا في بالك تفكري فكري في حل كيف توصلين لهدفك لاتخلين تفكيرك سلبي الناس الي تحقق اهدافها تفكيرهم كله ايجابي وايجاد حلول بعيدين عن السلبيه والاعذار
خلي في بالك انه ممكن في اشخاص غيرك عندهم نفس حلمك ووصلو له ونجحو انتي وش ناااقصك عشان ماتوصلين له نفسهم
فكري في فرحتك والاشياء الحلوه الي تصيرلك لمن يتحقق هذا الشيء .. صدقوني كل الصعوبات والفشل لها لذه حلوه لمن تتعدينها وتتعلمين منها ... لاتحطي في بالك ان الشخص الايجابي هو انولد ايجابي لا هو اختار مسار تفكيره وانتي قادره تختاري مسار تفكيرك لـ أيجابيه حياتك كلها راح تتغير بمجرد تغيري بتفكيرك
* هالمره راح احط مثال علي نفسي شوي من قبل كنت تفكيري كله سلبي وحلطمه وتشكي ومافي شيء ابدا عاجبني بمجرد ماغيرت تفكيري وعرفت كيف اتحكم ب أفكاري حياتي اشوفها تغيرت كثير وحققت الحمدلله اشياء كنت قبل اشوفها شيء صعب
قرأت كتاب بذيك الفتره اسمه التفكير الايجابي لـ فيرا بيفر وساعدني بتغير هذي النقطه
2
الاشخاص المحبطين اعملو لهم ديليت من حياتكم الاشخاص الي يقولو لك ليش ولا ومارح تقدر ومن قالك وغيرك بياكلك وانتي مارح تسوي شيء لاتسمعون لهذولا الناس وممكن بالاساس يوقف ضدك ويحطمك هم اقرب الناس لك حاولو ماتسمعون لهم
الاكيد هذولا راح يأخرونك ويخلوك بمكانك اضيفي لحياتك اشخاص يساعدونك ويحفزونك وخلي كلام المحبطين دافع لك
3
كوني مؤمنه بنفسك وقدراتك وتفكيرك والاشياء الي تبغينها لانه اذا دخلتي اي مكان وانتي واثقه ومقتنعه بنفسك راح تقنعي الي قدامك اكثر انه يسمع كلامك ويلبي لك طلبك اما اذا كنتي تبي تطلبي شيء من شخص وانتي محبطه وموواثقه انك بتحصلي عليه
ولاتستاهليه او انه يكون لك عمرك مارح تقنعي الي قدامك يعطيك ذا الشيء
4
حطي في بالك توقعات ولو بنسبه قليله انه ممكن يصير عقبات قدامك النقطه هذي مااقصد فيها تفكير سلبي نفس النقطه الاولى الي تكلمت عنها لا ابيك تحطي في بالك احتمال انه بيصير عقبات عشان نفسك وعشان لاتنصدمي وتتحطمين وترجعين لنقطه الصفر اذا حطيتي احتمال انه ممكن يصير شيء وقتها انتي عديتي مرحلة الصدمه وانتقلتي لمرحله التفكير بحل للمشكله
ليست هناك تعليقات:
إرسال تعليق