تجربتي لتخلص من حب الشباب

 صباح/مساء الخير

كيفكم ي حلوات ان شاء الله كويسات ....؟!

تدوينة اليوم راح تتكلم عن حب الشباب والمشكله هذي الاغلب يعاني منها من فترة المراهقه تبدي وممكن تستمر لبعد هذي المرحله


بالمرحله هذي كثير نسمع اشاعات وتجارب من الناس اشياء كثيره يقترحوها عليك تجربيها وانها تفيد بالعلاج

لمن كنت بذيك الفتره كانو الناس يقولو لي جربي ذا وجربي ذاك ويشيل الحبوب وكان العجب العجاب اقتراحهم علي

من الاشياء الي قالو لي عليها التايد ....؟! متخيلين بس كانو مصممين علي اقاربي اجرب التايد وانا ماكنت مقتنعه انه فعلا

منتج مومخصص للبشره بيسوي نتيجه كويسهه , بس مع كثرة اصرارهم ومع الايام جربته ولمره وحده بس ووقفت

لانه بانت نتيجه عكسيه معي من اول مره وهي حكه بالجلد  خلاصة كلامي لاتفكري تجربي منتج مومخصص للجلد

حتى كنت اسمع كلام من الناس و اهلي انه الحبوب بس تعدي عمر 18 سنه بتختفي من نفسها مايحتاج تروحي لدكتور جلديه

كنت احاول كثير في اهلي بس مافي فايده لحد ماصارت مومجرد تهيج بالجلد وصلت لمرحله الالتهاب

صارت الحاله عباره عن حكه واحمرار وقشور وحبوب والحبه بنفسها تكبر وتكبر وينزل منها الدم

مع اني كنت احاول ماالمسها عشان ماتلتهب وتكبر بس كانت هي بنفسها تكبر  وتنفقع

برضو كنت اول مااخرج بالنهار وفي شمس تزيد الحاله الالتهاب بالجلد ورحت لدكتور وقالي تااخرتي بجيتك

 وبذيك الفتره برضو صرررفت فلوس كثيره على منتجات وخلطات منزليه  واغلبها من خلال قراءة تجارب بنات بالنت

من غسولات وكريمات وماسكات ....الخ  ولااشششيء منها ابدا فادني جربت المنتجات الرخيصه والغاليه

ونتيجه الي اخذتها لخبطه في البشره نوعيتها كانت مختلطه (دهني / عادي ) وصارت مختلطه (دهني / جاف )

وزي ماانتو عارفين انه البشره الجافه صعبه لانه تحتاج تنظيف عميق مثل الدهنيه والا بتظهر لي القشور

وذي مشكله بالنسبه لي اشوف البشره العاديه اهون بكثير لان وقت الميك اب احتاج ترطيب وتقشير كثير والا تظهر لي قشور

بالمنطقه الجافه  وللاسف مرات ارطب + برايمر وتظهر القشور وقت الميك اب بعكس ايام اول وبشرتي بالمنطقه هذي عاديه

فنصيحتي لكم ب اول ماتظهر المشكله هذي روحو لدكتور جلديه مخصص ويساعدكم باانهاء المشكله او تخفيفها في بداية ظهورها

حتى ماتوصل للمرحله التهاب مثل ماحصل معي وحتى ماتوصلو لمرحلة الصرف بالفلوس بمنتجات ماتعرفو ايش ممكن تسوي لكم

اول شيء بنتعرف على المرض هذا

حب الشباب عباره عن مرض جلدي تهيجي او التهابي يكون بسبب المسامات الجلديه والغدد الدهنيه

يظهر نتيجة تغير للهرمونات بفتره المراهقه / بكتريا واوساخ تسد المسام وتظهر الحبوب / وراثي / العدوى / نمط الحياه بالاكل /

الحاله النفسيه والحبوب تكون لونها احمر تكون قاسيه شوي او بيضاء وجوتها زي الماء او الصديد تسمى متكيسه

بالغالب الحبوب هذي تظهر بالوجه وبنادر تكون في الجسم ومن الاعراض ونتائج الي بتظهر لك بذي الفتره الندبات والتصبغات

اذا صرتي تلمسي الحبه بيدك وجلستي تلعبي فيها لحد ماتنفقع تظهر مكانها الندبه الي هي حفر او تصبغات الي هي اثار للحبه بنيه

كبقع وطرق العلاج في منها الادويه و الليزر

تجربتي بالعلاج انا عن طريق الادويه سوا حبوب او الاثار لكن راح نخصص التدوينه اليوم عن الحبوب فقط 

* كورس العلاج كان عباره عن 6 شهور و ب سته هذي منعني الدكتور من اكل الشوكلاه والاشياء المقليه بفتره العلاج نهائيا 

وطلب مني اخفف منها قد مااقدر بعد العلاج بس ماهو بالحرمان نفس فتره العلاج  وانا ماسمعت هالكلام ههههههه 

كنت اول 5 شهور وش زيني سامعه هالكلام وماخربط بالاكل بس ب اخر شهر خربت الدنيا وصرت اكل بشكل مبالغ اشياء مقليه 

وشوكلاه وجاء وقت المراجعه عند الدكتور وقتها ظهر شوي حبوب هنا الدكتور عطاني نظره وقالي عارف ماسمعتي كلامي 

وخربطي ولا ليش الحبوب رجعت تظهر والعلاج الي معطيكي اياه قوي واختكم في الله خافت منه لمن عصب عليها ههههه

قالي اذا تسمعي كلامي نكمل الكورس واذا ماتسمعيه نوقفه وعطاني كورس ثاني اضافي مدة شهر مع انه كان المفترض يكفيني 

كورس ال 6 شهور وبرضو منعني اني استخدم الخلطات في مكونتها العسل والزبادي والزيوت 

لانها تسبب تهيج لي بالبشره احمرار حكه و تظهر الحبوب 

كورس ال 6 شهور كان عباره عن كوراكني 

حبوب الكو راكني كثير كثير سمع عنها والاغلب متخوف منها الحبوب مافي منها خوف اذا بتكون تحت اشراف الطبيب وهذا اهم 

شيء لان يتطلب منك تحليل كل شهر للدم يتابعو لو في تااثير سلبي يتفادوه مبكر وماينفع تاخذه المقبله على الزواج او الحامل لان له 

نتائج عكسيه ومن كلام دكتور الي عالجة عنده انه المتزوجه لو تفكر بالحمل لازم يتوقف العلاج قبلها ب 6 شهور كحد اقل 

في فتره العلاج بالكوراكني تحتاجي تشربي ماء بشكل كثير وممكن يكون اكثر من حاجتك اللزمه الي كنتي تكتفي فيها قبل العلاج 

يسبب جفاف في الجسم والبشره غير ترطيب الداخلي للجسم بالماء بشرتك تحتاج الترطيب من الخارج والشفايف برضو 

ملاحظتي بالعلاج فقط كانت بالجفاف عانيت منه وبس انتهيت من العلاج صار الوضع طبيعي ماستمر الجفاف المبالغ فيه معي

والبعض يقول انه يسبب تساقط بالشعر ...الخ ماظهر معي شيء من ههذا الكلام الحمدلله 

                                                            السعر :117 ريال 

                                                            المكان : في اي صيدليه يتوفر 

كورس الشهر الثاني الاضافي كان عباره عن حبوب برضو ماافتكر اسمها  بس اظن انها الروكتان و ماكانت مسببه اي نتائج عكسيه 

معي ولي سنتين كامله من انهيت فتره العلاجات هذي والحمدلله مارجعت لي الحبوب ممكن بشهر او كل كم شهر تظهر حبه او

حبتين فقط وتكون بسبب الافراط في الشوكلاه والاكل المقلي او تقصير في نظافة البشره او بسبب الدوره الشهريه وخربطة 

 في الهرمونات هذي الحبوب طبيعي تظهر بس اانا اتكلم عن الحبوب الي تكون ماليه الوجه حب الشباب الي مايتجاوب مع اي منتج 

علاجي لاعسول ولا شيء 

الغسول سعره : 59

المرطب سعره : ب 100 وشوي 

برضو استخدمت غسول سيتافيل ومرطب سيتافيل 

المنتجات طبيه ماتسبب اي حساسيه خاصه بالبشره المعرضه لحب الشباب 

تناسب برضو جميع انواع البشره وغير معطره المنتجات 

الغسول عباره عن رغوه ومثل اي غسول تستخدميه ببللي بشرتك بالمويه وشوي من الغسول وابدي تنظيف البشره

كان يسبب جفاف بالبشره يمتص لي كل الدهون فكنت احتاج الترطيب قوي وبكثره من بعده 

المرطب ترطيبه قوي ولحد الان مستمره عليه بس الغسول بعد 6 شهور وقفه عني الدكتور وغيره لي بغسول ثاني 

الغسول الثاني اسمه bio clin 

الغسول هذا لي سنتين مستمره عليه وهو افضل غسول طبي واشوفه افضل من سيتافيل 

السبب الي اعجبني فيه انه مايسبب جفاف بالبشره مثل سيتافيل ويمنع حب الشباب من ظهور ويمتص الدهون 

مااستغني عنه ابدا الغسول هذا ومرتين باليوم استخدمه 

السعر بحدود  ال 150 تقريبا 

ثاني منتج مااستغني عنه ابدا المنقذ من الحبوب الي تظهر فجائه محلول ديرمات 

استخدمته من كورس العلاج ولحد الان مستمره عليه 

عباره عن محلول تستخدميه ب اعواد الاذن على الحبه فقط يعني موضعي 

مرات قبل موعد الدوره الشهريه بكم يوم احط بقطنه وامسح في الوجه كله  بعد الغسول 

الطريقه هذي منعت الحبوب انها تظهر بوقت الدوره الشهريه 

 استخدامه مرتين اليوم ع الحبه بالكثير 4 ايام ويجفف الحبه تروح من غير ترك اثر 

منتج ديفرين  متوفر منه الجل والكريم والي استخدمته الكريم 

عباره عن مقشر خفيف للبشره ويعالج الحبوب استخدامي له مره او مرتين بالاسبوع 

بس انتيهي يجي شيء في اطراف الانف و حوالين الفم والعين 

والتنيه هذا من الدكتور الي عالجة عنده في بنات ينصحو فيه لكن يقولو لك عادي مااياثر ع المناطق الي نبهتكم عنها

مااظن انه مااياثر لو ماياثر ماكان نبهني الدكتور ماحط شيء عليها وقت استخدامه بالليل وماتعرضي بشرتك للضوء والشمس 

كميه بسيطه توزعينها على كامل الوجه وتنامي فيها بس تقومي تغسلي وجهك بالغسول 

السعر مافتكره كم بس اقل من 50 ريال

واقي الشمس اسمه floxla

نسبة الحمايه فيه 50 

الواقي هذا من فتره العلاج ولحد الان مستمره عليه  وانك تحمي بشرتك من الشمس اهم شيء في فتره العلاج 

وبرضو اذا بيتعرض بشرتك لحراره الفرن تستخدميه 

الحلو فيه انه مايسبب لي طبقات دهنيه مع الوقت او لون ابيض على البشره 

سعره : 140 ريال 

المنتجات كلها تلقيها في اي صيدليه 

* تلاحضو انه اغلب المنتجات البشره  الي ذكرتها مستمره عليها من سنتين 

الحمدلله مرتاحه عليها ومااني مستعده اخاطر في منتجات ثانيه 

كغسول ومرطب ومنتجات علاجيه فقط المقصوده ممكن مايكون في ذكر كثير عنهم من بعد هالتدوينه 

لكن كسيرومات واقنعه كتوحيد وترطيب ونظاره راح يكون في ذكر عنهم بين فتره وثانيه وتجاربي 

اتمنى حبايبي تكونو استفدتو من التدوينه 

شاركوها مع من تحبون وتابعوني على مواقع التواصل الاجتماعيه 

ولاتبخلو علي بتعليقاتكم وارائكم واقتراحكم 

موفقين